Shirishkumar Sherkhane

लातूर येथे पत्रकारांसाठी शुक्रवारी कार्यशाळा
लातूर, दि. ३० (जिमाका): माहिती व जनसंपर्क महासंचालनालय, लातूर विभागीय माहिती कार्यालय आणि लातूर जिल्हा माहिती कार्यालय यांच्या संयुक्त विद्यमाने शुक्रवार, १ ऑगस्ट २०२५ रोजी जिल्ह्यातील पत्रकारांसाठी एकदिवसीय कार्यशाळेचे आयोजन करण्यात आले आहे. लातूर शहरातील डॉ. भालचंद्र रक्तपेढी सभागृहात सकाळी १०:३० वाजता जिल्हाधिकारी वर्षा ठाकूर-घुगे यांच्या हस्ते या कार्यशाळेचे उद्घाटन होईल.

जिल्हा पोलीस अधीक्षक अमोल तांबे कार्यक्रमाच्या अध्यक्षस्थानी असतील, तर लातूरचे प्रभारी विभागीय माहिती उपसंचालक विवेक खडसे यांची प्रमुख उपस्थिती राहील.

या कार्यशाळेत ‘कृत्रिम बुद्धिमत्ता आणि पत्रकारिता’ या विषयावर जिल्हा सूचना विज्ञान अधिकारी पुरुषोत्तम रुकमे मार्गदर्शन करतील, तर ‘वृत्त संकलन आणि संपादनात शुद्धलेखनाचे महत्त्व’ या विषयावर परभणी येथील मराठी भाषा तज्ज्ञ प्रा. दीपक रंगारी मार्गदर्शन करतील. तसेच, विभागीय माहिती कार्यालयाचे सहायक संचालक (माहिती) डॉ. श्याम टरके हे अधिस्वीकृती नियमावली, आचार्य बाळशास्त्री जांभेकर पत्रकार सन्मान योजना आणि शंकरराव चव्हाण पत्रकार कल्याण निधी याविषयी माहिती देतील. जिल्ह्यातील सर्व पत्रकार, वृत्तपत्र प्रतिनिधी आणि संपादक यांनी या कार्यशाळेस उपस्थित राहावे, असे आवाहन लातूर विभागीय माहिती कार्यालय आणि लातूर जिल्हा माहिती कार्यालय यांच्यातर्फे करण्यात आले आहे.

लातूर: येथील दयानंद शिक्षण संस्थेच्या दयानंद विधी महाविद्यालयामध्ये ‘स्पोर्ट्स लॉ अ‍ॅज अ करिअर अपॉर्च्युनिटी फॉर लॉ स्टुडंट्स: टर्निंग पॅशन इनटू प्रोफेशन’ या विषयावर ख्राईस्ट युनिव्हर्सिटी, लवासा येथील प्रख्यात कायदेतज्ञ डॉ. संजय बंग यांचे अत्यंत उद्बोधक व्याख्यान संपन्न झाले. नुकतीच केंद्र शासनाने नॅशनल स्पोर्ट पॉलीसीला १ जुलै २०२५ रोजी मान्यता दिलेली आहे. या पार्श्वभूमीवर सदर व्याख्यानाचे आयोजन करण्यात आले.
या व्याख्यानाचा मुख्य उद्देश विधी विद्यार्थ्यांना क्रीडा क्षेत्रातील कायदेशीर पैलूंमध्ये असलेल्या वाढत्या संधींबद्दल माहिती देणे आणि त्यांना या क्षेत्रातील करिअरच्या शक्यतांबद्दल मार्गदर्शन करणे हा होता.
प्रास्ताविकात प्राचार्या डॉ. पूनम नाथानी यांनी अशा प्रकारच्या उद्बोधक व्याख्यानाची आवश्यकता विशद केली. यासाठी दयानंद शिक्षण संस्थेच्या महाविद्यालय विकास समितीचे सदस्य ॲड. आशिष वाजपेयी यांचे विद्यार्थ्यांच्या हितासाठीचे सतत मार्गदर्शन असते. त्यांच्या मार्गदर्शनाखालीच आजच्या व्याख्यानाचे आयोजन केले यावर त्यांनी विशेष भर दिला.
या व्याख्यानात डॉ. बंग यांनी क्रीडा कायद्याची वाढती व्याप्ती आणि या क्षेत्रातील करिअरच्या विविध संधींवर प्रकाश टाकला. जागतिक स्तरावर क्रीडा क्षेत्रातील वाढत्या व्यावसायिकतेमुळे कायदेशीर समस्यांचे प्रमाणही वाढले आहे. खेळाडूंचे हक्क, डोपिंगविरोधी कायदे, कराराचे वाद, बौद्धिक संपदा हक्क, प्रसारण हक्क, खेळ प्रशासनाचे नियम आणि खेळाडूंच्या नैतिक जबाबदाऱ्या, खेळाडूंचे कल्याण, स्पर्धांचे नियमन, वाद निराकरण आणि आंतरराष्ट्रीय क्रीडा कायदे अशा अनेक पैलूंमध्ये कायदेशीर मदतीची गरज असते. अशा परिस्थितीत, क्रीडा कायद्याचे जाणकार असलेले वकील, सल्लागार आणि प्रशासकांची मागणी वाढत असल्याचे डॉ. बंग यांनी नमूद केले.
डॉ. बंग यांनी विद्यार्थ्यांना क्रीडा कायद्याच्या अभ्यासासाठी आवश्यक असलेल्या कौशल्यांबद्दलही माहिती दिली. यामध्ये कराराचे कायदे, आंतरराष्ट्रीय कायदे, मध्यस्थी (Arbitration), तसेच क्रीडा क्षेत्रातील तांत्रिक आणि व्यावसायिक बाबींचे ज्ञान असणे महत्त्वाचे आहे. त्यांनी सांगितले की, केवळ कायद्याचे ज्ञान पुरेसे नसून, खेळाची आवड आणि या क्षेत्रातील नवीनतम घडामोडींची माहिती असणेही तितकेच महत्त्वाचे आहे.
या व्याख्यानाने विधी विद्यार्थ्यांना क्रीडा कायद्याच्या क्षेत्रात असलेल्या उज्ज्वल भविष्याबद्दल एक नवीन दृष्टिकोन दिला आणि अनेकांना त्यांची क्रीडा क्षेत्रातील आवड एका व्यावसायिक संधीमध्ये रूपांतरित करण्यासाठी प्रेरणा दिली. हे व्याख्यान विधी महाविद्यालयातील विद्यार्थ्यांसाठी अत्यंत उपयुक्त ठरले, कारण त्यांना एक अपारंपरिक परंतु वाढत्या मागणीचे करिअर क्षेत्र म्हणून क्रीडा कायद्याची ओळख झाली.
कार्यक्रमाचे सूत्रसंचालन बी एल बी पाचव्या वर्षाची विद्यार्थिनी कु.प्रणिता शेंडगे यांनी तर आभार प्रदर्शन बी ए एल बी द्वितीय वर्षाची विद्यार्थिनी कु गार्गी बस्तापुरे यांनी केले. यावेळी विद्यार्थी आणि प्राध्यापक मोठ्या प्रमाणावर उपस्थित होते.

७ जुलै रोजी आझाद मैदानात संत कक्कय्या समाजाचे धरणे आंदोलनासाठी लातूर येथे बैठकीचे आयोजन

लातूर:- संत कक्कय्या समाजासाठी स्वतंत्र आर्थिक विकास महामंडळ स्थापन व्हावे, या मागणीसाठी आणि माजी मुख्यमंत्री एकनाथ शिंदे यांनी सभागृहात दिलेल्या आश्वासनाची आठवण करून देण्यासाठी वीरशैव कक्कय्या कल्याण मंडळ, मुंबई यांच्या वतीने सोमवार, दि. ७ जुलै २०२५ रोजी आझाद मैदान येथे एक दिवसीय धरणे आंदोलनाचे आयोजन करण्यात आले आहे.

संत कक्कय्या समाजाच्या महामंडळ स्थापनेच्या मागणीसाठी यापूर्वीही २८ जून २०२४ रोजी आंदोलन करण्यात आले होते. त्या आंदोलनाला राज्यभरातील समाजबांधव, भगिनी, संस्था, महासंघ आणि संघटनांचा मोठा प्रतिसाद मिळाला होता. त्यानंतर माजी मुख्यमंत्री एकनाथ शिंदे यांनी सभागृहात समाजाला महामंडळ देण्याचे जाहीर आश्वासन दिले होते. मात्र, त्याची अद्याप अंमलबजावणी झालेली नाही.

कल्याण मंडळाचे पदाधिकारी सातत्याने प्रशासनाशी संपर्कात राहून पाठपुरावा करत आहेत. अधिवेशनानंतर निवडणुका जाहीर झाल्या, मंत्रिमंडळ बदल झाला, परंतु शासन निर्णय मात्र अद्याप पारित झालेला नाही.

मागील महिन्याभरात कल्याण मंडळाने समाज कल्याण मंत्री संजय शिरसाट व त्यांच्या सचिवांशी चर्चा करून पाठपुरावा सुरू ठेवला आहे. तरीही शासनाकडून सकारात्मक निर्णय घेतला जात नसल्याने, मंडळाच्या वतीने दि. ३ जून रोजी मुंबईत आयोजित सभेत ४० हून अधिक जिल्ह्यांतील सभासदांनी आंदोलनाची गरज व्यक्त केली. त्या पार्श्वभूमीवर शासनाचा निषेध नोंदवण्यासाठी व हक्काचे महामंडळ मिळवण्यासाठी पुन्हा एकदा धरणे आंदोलन करण्यात येत आहे. संत कक्कय्या समाजातील सर्व बांधवांनी या आंदोलनात मोठ्या संख्येने सहभागी व्हावे, माननीय यशवंतराव नारायणकर, शिंदे सर, शशिकांत सोनवणे सर, आधी यांच्यावतीने मार्गदर्शन झाले. असे आवाहन वीरशैव कक्कय्या कल्याण मंडळ, मुंबई यांच्या वतीने करण्यात आले आहे. यावेळी लातूर जिल्ह्यातील सर्व वीरशैव कक्कया समाजातील ॲड. जांबुवंतराव सोनकवडे, शंकरराव इंगळे, श्रीमंतराव कावळे, आदीसह सर्व समाज बांधव मोठ्या संख्येने उपस्थित होते.